Mulat Sarira Jumangkah Jantraning Laku: Pengetan 271 Taun Hadeging DIY Lumampah Kanthi Khidmat
BANTUL – Swasana dinten Jemuwah (13/3/2026) ing RS Paru Respira katingal béda saking dinten-dinten biasanipun. Kanthi ngginakaken busana adat Jawi jangkep, sedaya karyawan sarta jajaran manajemen kempal manunggal nindakaken upacara pengetan Hadeging DIY kaping 271 kanthi khidmat ing halaman griya sakit.
Wonten ing kalodhangan menika, Purwanto, SKM, MARS jumeneng minangka Inspektur Upacara. Upacara menika mboten namung ritual tahunan, nanging dados sarana kanggé nggugah malih semangat kamanunggalan lan raos tresna dhumateng tlatah Ngayogyakarta Hadiningrat.
Filosofi Tema: Mulat Sarira Jumangkah Jantraning Laku
Pengetan Hadeging DIY taun 2026 menika ngusung tema ingkang nggadhahi filosofi lebet, inggih menika “Mulat Sarira Jumangkah Jantraning Laku”. Ing amanatipun, Purwanto, SKM, MARS ngandharaken bilih tema menika mratandhani kados pundi warga DIY kedah saged mawas dhiri.
“Mulat Sarira tegesipun kita kedah introspeksi utawi mawas dhiri, mirsani punapa ingkang sampun kita paringaken kanggé masyarakat. Déné Jumangkah Jantraning Laku nggambaraken tekad kita kanggé terus maju ndhèrèk lakuning jaman kanthi mboten nilaraken jati dhiri budaya,” ngendikanipun Purwanto ing sangajenging para peserta upacara.
Layanan Kasarasan lan Semangat Budaya
Minangka Inspektur Upacara ing lingkungan griya sakit, Purwanto ugi nandesaken bilih semangat Hadeging DIY menika kedah dipun-terapaken wonten ing layanan publik, utaminipun babagan kesehatan. RS Paru Respira dipun-ajab saged terus paring layanan ingkang prima lan “nguwongke” pasien, laras kaliyan nilai-nilai luhur budaya Jawi.
“Semangat 271 taun menika mugi saged nambah motivasi kita sedaya ing RS Paru Respira kanggé jumangkah luwih saé, paring kasarasan kanggé warga DIY, sarta njagi karukunan lan gotong royong,” tambahnipun.
Swasana Upacara
Upacara katingal asri lan klasik. Sedaya peserta upacara katingal gagah lan anggun ngginakaken busana tradisional. Swanten gamelan ingkang dipun-ungelaken nambah kekidhmantaning swasana, saéngga upacara menika saged dados momentum kanggé ngronce malih tali paseduluran antawisipun punggawa praja lan masyarakat.
Adicara dipun-pungkasi kanthi donga sesarengan, nyuwun supados Daerah Istimewa Yogyakarta tansah pinaringan kaberkahan, katentreman, lan kemakmuran kanggé sedaya rakyatipun.
Mugi-mugi kanthi semangat “Mulat Sarira Jumangkah Jantraning Laku”, RS Paru Respira saged terus nggayuh prestasi lan paring kontribusi ingkang nyata kanggé kemajuan DIY.
Maturnuwun.
Write a Comment